อโต หิ นิจฺจํ อิมมุตฺตมํ ตมํ;
วิธูย สิกฺเข คุณสํหิตํ หิตํ;
นโร หิ สกฺกจฺจวปูรโต รโต;
สุขสฺส สพฺพงฺคณกมฺมทํ ปทํฯ
[960]
วินเย ปฏุภาวกเร ปรเม;
ปิฏเก ปฏุตํ อภิปตฺถยตา;
วิธินา ปฏุนา ปฏุนา ยตินา;
ปริยาปุณิตพฺพมิทํ สตตํฯ
นิคมนกถา
[961]
รจิโต พุทฺธทตฺเตน, สุทฺธจิตฺเตน ธีมตา;
สุจิรฏฺฐิติกาเมน, สาสนสฺส มเหสิโนฯ
[962]
อนฺตเรนนฺตรายํ ตุ, ยถา สิทฺธิมุปาคโต;
อตฺถโต คนฺถโต เจว, อุตฺตโรยมนุตฺตโรฯ
[963]
ตถา สิชฺฌนฺตุ สงฺกปฺปา, สตฺตานํ ธมฺมสํยุตา;
ราชา ปาตุ มหิํ สมฺมา, กาเล เทโว ปวสฺสตุฯ
[964]
ยาว ติฏฺฐติ เสลินฺโท, ยาว จนฺโท วิโรจติ;
ตาว ติฏฺฐตุ สทฺธมฺโม, โคตมสฺส มเหสิโนฯ
[965]
ขนฺติโสรจฺจโสสีลฺย-พุทฺธิสทฺธาทยาทโย;
ปติฏฺฐิตา คุณา ยสฺมิํ, รตนานีว สาคเรฯ
[966]
วินยาจารยุตฺเตน, เตน สกฺกจฺจ สาทรํ;
ยาจิโต สงฺฆปาเลน, เถเรน ถิรเจตสาฯ
[967]
สุจิรฏฺฐิติกาเมน , วินยสฺส มเหสิโน;
ภิกฺขูนํ ปาฏวตฺถาย, วินยสฺส วินิจฺฉเยฯ
[968]
อกาสิํ ปรมํ เอตํ, อุตฺตรํ นาม นามโต;
สวเน สาทรํ กตฺวา, สิกฺขิตพฺโพ ตโต อยํฯ
[969]
ปญฺญาสาธิกสงฺขฺยานิ, นวคาถาสตานิ หิ;
คณนา อุตฺตรสฺสายํ, ฉนฺทสานุฏฺฐุเภน ตุฯ
[970]
คาถา จตุสหสฺสานิ, สตญฺจ อูนวีสติ;
ปมาณโต อิมา วุตฺตา, วินยสฺส วินิจฺฉเยติฯ
อิติ ตมฺพปณฺณิเยน ปรมเวยฺยากรเณน ติปิฏกนยวิธิกุสเลน ปรมกวิชนหทยปทุมวนวิกสนกเรน กวิวรวสเภน ปรมรติกรวรมธุรวจนุคฺคาเรน อุรคปุเรน พุทฺธทตฺเตน รจิโต อุตฺตรวินิจฺฉโย สมตฺโตติฯ
อุตฺตรวินิจฺฉโย นิฏฺฐิโตฯ